Në Komisionin e Ligjeve ku po diskutohet për “Për buxhetin e vitit 2025”, Sekretarja e Presidencës, Valbona Lusha ka treguar sesi do të përdoret fondi nga ky institucion.
Ajo është shprehur se pjesa më e madhe e fondit do të përdoret për rikonstruksionin e godinës së Presidencës. Lusha gjithashtu ka kërkuar një fond shtesë prej 36 milionë lekësh, duke thënë se nevojiten për blerjen e makinave të reja në dispozicion të presidentit të republikës dhe stafit tekniko administrativ.
“Lidhur me buxhetin 2025-2027, investim në orendi dhe pajisje zyre është i nevojshëm për godinën që do të rikonstruktohet. Investimi për pajisje kompjuterike dhe elektronike, përbën një domosdoshmëri në plotësimin e nevojave të institucionit. Rëndësi të veçantë në buxhet ka përfundimi i objektit të godinës ekzistuese të institucionit të Presidencës. Në lidhje me kërkesat shtesë, me mbështetje me fonde shtesë, për blerje automjetesh në dispozicion të presidentit të republikës dhe stafit tekniko administrativ, vlera 36 milionë lekë. Mjetet nuk plotësojnë kushtet e nevojshme, nisur nga viti i prodhimit, kilometrat, amortizimi dhe garancinë në funksionin që kryejnë. Jetëgjatësia e automjeteve është 12-15 vite. Është e nevojshme blerja e automjeteve për një perfomacë sa më të lartë”, tha Lusha.
