Kryeministri Edi Rama ka dhënë një intervistë për televizionin ‘La7’ në Itali ka folur për bumin turistik në vend gjatë këtij sezoni, vizitën e Giorgia Melonit dhe raportet ekonomike mes dy vendeve.
“Situata në Shqipëri ka ndryshuar. Është fantastike sepse nuk kemi shpenzuar asgjë për këtë lloj reklame që i është bërë vendit në të gjithë Europën. Shpresojmë që ky sukses të na ndjekë edhe në të ardhmen pa na u rritur mendja”, tha Rama.
Rama ka folur edhe për marrëdhënien e ngushtë me homologen Meloni. Pavarësisht këndvështrimeve të ndryshme politike me të ka shumë gjëra që na bashkojnë, ka thënë Rama.
“Unë i përkas një politike tjetër të së majtës që ngjason me atë të Klinton apo edhe të Romano Prodit. Nëse nevojitet e majta jonë merr vendime që mund të interpretohen edhe si politikë e djathtë. Në gjithë këto vite mes Shqipërisë dhe Italisë nuk ka pasur ndonjëherë diferencë në marrëdhënie pavarësisht ngjyrës politike të pushtetit. Gjithmonë ka pasur miqësi dhe marrëdhënie që lidhen me historinë apo edhe kulturën e ngjashme. Mes të dy vendeve ka projekte të rëndësishme strategjike që duhen realizuar. Italia është avokatja e shqipërisë në procesin e integrimit dhe është një vend për tu marrë shembull“, shtoi Rama.
