Dita e Flamurit duket se ka thyer “akullin” në raportet mes kryeministrit Edi Rama dhe kryeministrit të Kosovës, Albin Kurti, të cilët janë bërë bashkë në Vlorë.
Ata kanë qenë të pranishëm në ceremoninë simbolike të ngritjes së flamurit kuqezi në Vlorë. Bashkë me ta ka qenë edhe Presidenti i Republikës, Bajram Begaj dhe kryetarja e Kuvendit Lindita Nikolla.
Pas ceremonisë së ngritjes së flamurit, liderët e shtetit shqiptar, bashkë me Kryeministrin e Kosovës kanë vendosur kurora me lule në memorialin e Pavarësisë në Vlorë. Më pas Begaj, Rama, Kurti dhe Nikolla janë takuar me qytetarët që ishin të pranishëm në këtë ceremoni.
Dy kryeministrat shqiptarë kanë shtrënguar duart me njëri-tjetrin pas homazheve pranë monumentit simbol të kurorëzimit të perpjekjeve shekullore për liro. Më 28 nëntor 1912 Ismail Qemali ngriti flamurin në Vlorë dhe shpalli pavarësinë e Shqipërisë.
