Ish-ministrja e Mbrojtjes, Olta Xhaçka, është marrë zyrtarisht nën hetim nga SPAK, për dyshimet për korrupsion dhe pastrim të produkteve të veprës penale. Sipas gazetares Klodiana Lala, Xhaçkës në prani të avokatit të saj, i është komunikuar zyrtarisht statusi i personit nën hetim.
Xhaçka u paraqit në ambientet e SPAK dy ditë më parë, vetëm pak minuta pasi nga aty ishte larguar bashkëshorti i saj, ish-deputeti socialist Artan Gaçi, i cili po ashtu raportohet se është nën hetim për të njëjtat akuza.
Hetimet ndaj çiftit po kryhen nga prokurorët e posaçëm Ols Dado dhe Altin Dumani dhe lidhen me të dhëna të siguruara nga jashtë vendit, përmes letërporosive. Mësohet se hetimet po përqendrohen te dyshimet për afera korruptive dhe transaksione të kryera përmes kompanive të lidhura me bashkëshortin e ish-ministres.
Artan Gaçi, ish-deputet i Partisë Socialiste, ka përfituar statusin e investitorit strategjik për një projekt turistik. Në kuadër të hetimeve, po shqyrtohen edhe rrethanat e pronësisë mbi truallin ku po ndërtohet resorti, për të cilin janë ngritur pretendime për përfitim përmes falsifikimit.
