Edhe pse Shqipëria nuk e ka në kalendarin e detyrueshëm vaksinën ndaj meningitit, prindërit u kërkojnë mjekëve pediatër se ku mund ta gjejnë dhe kur mund të aplikojnë për këtë vaksinë tek fëmijët e tyre.
Pas humbjes së jetës së 17 vjeçares nga Durrësi për shkak të meningitit, mjekët pediatër thonë se sëmundshmëria për meningjitin është e rrallë dhe po kështu vdekshmëria. Përllogaritet 1 në 100 mijë, por meningokoku C është ai që i rriskon më tepër.
Por në cilën moshë duhet të vaksinohet fëmija ndaj meningokut?
“Ai që rrezikon seriozisht është meningokoku “C”. Ai shkakton meningokoksemi, e cila jep një gjendje shokante që nuk arrin ta menaxhojë as reanimacioni. Unë i këshilloj të bëjnë vaksinën, pasi edhe lëvizjet e njerëzve janë shtuar. Ne kemi pasur vjet shumë raste në Itali me meningjit. Vaksina bëhet 8 dhe 10-muajsh në dy doza, por nëse nuk e kanë bërë gjatë kësaj periudhe ajo mund të aplikohet deri në moshën 18 vjeç”, tha Dr. Adriana Ilias.
