Një incident ka ndodhur pasditen e kësaj të diele në qytetin e Fierit. Një banderolë e vendosur në qendër të qytetit u bë dhe shkaktare për shoqërimin në Polici të kandidatit të Partisë Demokratike në qarkun e Fierit, Fatjon Semanjakun.
Ky i fundit kundërshtoi me forcë Policinë Bashkiake të cilët kishin shkuar për të hequr banderolën e Semanjakut të vendosur pa leje në qendër të qytetit.
U desh ndërhyrja e Policisë së Shtetit për të neutralizuar situatën, ndërkohë që u përballën dhe me qëndrimin e demokratit i cili iu drejtua efektivëve duke u thënë: “Mos më prekni me dorë”.
Burime për mediat bëjnë me dije se ka qenë drejtuesi politik i PD në Fier, Gazment Bardhi ka shkuar në ambientet e Komisariat, ndërkohë që Semanjaku pas deklaratës së dhënë është lënë i lirë.
