Bashkimi Europian në Shqipëri ka përshëndetur nisjen e fazës së dytë në procesin e negociatave mes Shqipërisë dhe BE.
Delegacioni i BE thekson se në Bruksel sot kanë nisur takimet 2-palëshe të shqyrtimit analitik të grupit të dytë të kapitujve, ku trajtohen katër liritë themelore të tregut të përbashkët.
“Procesi i negociatave të anëtarësimit të Shqipërisë në BE po ecën përpara! Dje përfundoi procesi i shqyrtimit analitik të grupit të parë të kapitujve, që fokusohen kryesisht në të drejtat themelore të BE-së, sundimin e ligjit, reformën e administratës publike dhe kriteret ekonomike. Sot në Bruksel nisën takimet dypalëshe të shqyrtimit analitik të grupit të dytë të kapitujve, ku trajtohen katër liritë themelore të tregut të përbashkët të BE-së: lëvizjen e lirë të njerëzve, shërbimeve, mallrave dhe kapitalit. Urime përfaqësuesve shqiptarë dhe vazhdoni punën e mirë”, njofton BE.
