Rama ka reaguar me ironi pas denoncimeve të opozitës të cilët kanë pretenduar se kryeministri ka bërë dy “krime zgjedhore”, konkretisht për bonusin e pranverës dhe për takimin me punonjësit e Bashkisë së Tiranës.
Në një reagim “flakë për flakë, Rama shkruan se “krime” të tilla, do t’i përsërisë edhe në vazhdim.
“Me paska denoncuar këneta për dy krime zgjedhore. E para, paskam kryer krim me bonusin e pranverës për pensionistët, që është shpallur që vjet falë rritjes së fortë ekonomike! Krime të tilla për pensionistët kam ndërmend të kryej akoma, madje edhe më të rënda se ky i marsit dua t’i bëj, këtë vit dhe në vitet në vijim, kështu që këneta të bëjë denoncimet e veta, ndërsa pensionistët e dinë vetë se ç’do t’i bëjnë kënetës më 11 maj. E dyta, paskam kryer krim në Sheshin Skënderbej me mbledhjen e punës me punonjësit e bashkisë që sapo kishin dalë nga puna. Ky është një tjetër krim që kam ndërmend ta përsëris, sepse në 16 maj Tirana do të mikpresë 46 udhëheqës të kontinentit europian dhe 8 lider të organizatave të mëdha si BE e NATO, kështu që ata punonjës kanë shumë punë për të bërë”, tha Rama.
