Zyrtarë të Lartë të Prokurorisë së Posaçme ndodhen në një vizitë zyrtare në SHBA vetëm 1 javë pasi drejtësia e re arrestoi dhëndrin e Sali Berishës, Jamarber Malltezin dhe ish-kryeministrin e mori nën hetim per dosjen “Partizani”.
Lajmi është bërë i ditur nga Ambasada Amerikane ku konfirmohet se 10 prokurorë të SPAK-ut me në krye Altin Dumanin po zhvillojnë takime me zyrtarë të lartë të (FBI-së) në SHBA.
“Zyrtarë të lartë të SPAK-ut po marrin pjesë në një vizitë studimore në Uashington, DC këtë javë. Të udhëhequr nga anëtarët e ekipit të Zyrës për Zhvillimin, Ndihmën dhe Trajnimin e Prokurorisë Jashtë Vendit të Ambasadës së SHBA në Tiranë (OPDAT), zyrtarët e SPAK-ut u takuan me drejtuesit kryesorë të Departamentit të Drejtësisë nga OPDAT dhe Programit Ndërkombëtar të Ndihmës për Trajnimin për Hetimet Penale (ICITAP). Prokurorët e SPAK diskutuan gjithashtu sfidat e sigurisë me Shërbimin Marshall të Shteteve të Bashkuara, i cili mbron gjyqtarët, prokurorët, stafin e gjykatës dhe dëshmitarët federalë të Amerikës. Vizita do të përfshijë gjithashtu takime me Departamentin e Shtetit të SHBA-së, Departamentin e Drejtësisë, Administratën kundër Narkotikëve (DEA) dhe Byronë Federale të Hetimit (FBI)”, njofton ambasada e SHBA.
