Partia Demokratike i ka kërkuar KQZ-së që të përjashtojë nga lista e PS Ardit Bidon, i cili sipas tyre mban ende detyrën e drejtorit të Përgjithshëm të Arkivave.
Sakaq, Ardit Bido përgënjeshtron PD-në duke deklaruar se ai prej datës 12 mars është larguar nga posti i Drejtorit të Përgjithshëm të Arkivave.
Bido thotë se partia e Berishës ka pranë vetes njerëz si Fredi Beleri që nuk dinë as të lexojnë shkresa dhe dokumente.
“Doktor dole prapë bllof: shihemi në Kuvendin e Shqiptarëve. PD e Belerit që e ka zënë halli se i del që do më ketë përballë në parlament e s’ka nga të fshihet më, doli për të dytën ditë radhazi në konferencë për shtyp vetëm kundër meje nga mbi 180 kandidatë të PS në këto zgjedhje, duke bërë bllofin e radhës. Thanë që nuk kam hequr dorë nga drejtor i Përgjithshëm i Arkivave, se as dinë të lexojnë ligjin e as të shohin dokumentet: aktin e pezullimit nga DAP që mban datën 12.03.2025, pra një ditë para se të kandidoja! S’ka habi: kështu është kur niveli intelektual i këshillimit të PD është ai i dijetarit të madh Fredi Beleri. Doktor, mos dil më bllof! Ti me aleancën e antishqiptarisë madhështore e unë me pastërtinë time!”, shkruan Bido.
