Kryeministri Edi Rama e ka nisur ditën me një lajm të mirë për shtresat në nevojë. Rama bën me dije se pensionistët do të marrin 80 mijë lekë të vjetra secili nga Pakoja e Madhe nga e cila thekson se do të përfitojnë 1 milionë shqiptarë.
“Me kënaqësinë e faktit se 695 mijë pensionistë do të marrin nga 8000Lekë (të reja) secili nga Pakoja e Madhe, ku do të kenë pjesën e tyre 1 milionë shqiptarë, që do të përfitojnë sipas kategorive deri në 20000Lekë (të reja), për të zbutur impaktin e inflacionit të luftës deri në fund të këtij dimri të vështirë për mbarë Europën”, shkruan Rama.
Ditën e djeshme, Rama bën me dije se qeveria që ai drejton është gati të shpërndajë 8 miliardë lekë, ku sqaron se këto para do të shkojnë për pensionistët, familjet në ndihmë ekonomike, posaçërisht nënat kryefamiljare në skemën e ndihmës ekonomike, paraplegjikët, tetraplegjikët, personat me aftësi të kufizuara, invalidët e punës, po edhe për punonjësit e shtetit.
