Kryeministri Edi Rama u ndal te situata e rëndë e përmbytjeve që kanë prekur vendin prej disa ditësh.
Gjatë Podcastit “Flasim”, Rama theksoi se fenomeni i permbytjeve nuk kan prekur vetëm Shqipërinë, duke hedhur poshtë opozitën dhe “mediat kazan” që e kanë ekzagjeruar. Ai tha se moti ekstrem ka përfshirë një hartë shumë më të gjerë gjeografike, deri në Stamboll, ku janë parë pamje apokaliptike.
Rama siguroi se qeveria do të qëndrojë pranë të gjithë qytetarëve të prekur nga përmbytjet, duke garantuar mbështetje për banesat, bagëtitë dhe dëmet e tjera të shkaktuara.
“Kjo është motoja ime dhe e jona sa herë fatkeqësi të ndryshme godasin vendin e njerëzit, që nga tërmeti shkatërrues i mijëra e mijëra shtëpive e deri tek sikleti rrënues i një familjeje të goditur nga uji, zjarri apo nga ndonjë fatkeqësi tjetër. Dhe dua t’u përcjell përsëri, të dëmtuarve nga kjo goditje e fatkeqësisë kësaj here, se ne do t’i qëndrojmë me të njëjtin dinjitet njerëzor, shtetëror dhe politik çdo detyrimi ndaj tyre, qoftë për banesat, qoftë për gjënë e gjallë. Puna jonë intensive nuk mbyllet me përmirësimin e situatës së motit, por do të vazhdojë me riparimin e dëmeve në infrastrukturë dhe të çdo dëmi në familjet e prekura nga uji. Ekipet tona të verifikimeve janë në terren që nga dita e parë, ndërkohë që Ministria e Financave e ka të përgatitur tanimë të gjithë planin me skenarët e dëmshpërblimit. Presim rezultatin përfundimtar të verifikimeve për të kaluar në fazën e dëmshpërblimeve“, tha Rama.
