Në 15-ditëshin e parë të Korrikut vihet re rënie e numrit të turistëve në brigjet e Vlorës, nëse e krahasojmë me të njëjtën periudhë të vitit të kaluar.
“Report TV” publikoi pamje nga Plazhi i Vjetër dhe në Lungomare, ku shezlongët në brezin e dytë dhe të tretë janë pothuajse bosh. Pushues nga qytete te ndryshme si Tirana e Prishtina por edhe turistët e huaj thanë se këtë vit çmimet janë rritur si në bare e restorante ashtu dhe në hotele.
“Çadrat kanë shkuar 10 euro në ditë, ndërsa dhomat nga 90 deri në 100 euro nata në Lungomare. Këtë vit është më shtrenjtë kudo nëpër plazhe. Çmimet janë skandaloze! Plazhistë s’ka”, thonë vendasit.
Kryebashiaku i Vlorës, Ermal Dredha u bëri thirrje bizneseve të mos abuzojnë me çmimet.
“Duhet të jenë të kujdesshëm që të mos i rrisin çmimet se do t’u kthehet në bumerang. Bizneset që operojnë në qytetin tonë mund të jenë konkurrues në rajon vetëm nëse mbajnë çmime të kënaqshme”, tha Dredha.
