Policia e Shtetit ka ngritur sërish alarmin për mashtrime të reja online, përmes mesazheve SMS dhe aplikacioneve të komunikimit, përfshirë WhatsApp-in, ku paraqiten në mënyrë të rreme si përfaqësues të institucioneve bankare dhe u kërkojnë qytetarëve të përditësojnë të dhënat bankare.
Bëhet fjalë për skema mashtrimi të tipit “phishing”, të cilat synojnë të vjedhin kredencialet e e-banking, kodet e verifikimit (OTP), PIN-et dhe të dhënat e kartave bankare. Këto të dhëna mund të përdoren më pas për transaksione të paautorizuara dhe dëme financiare.
Policia u bën thirrje qytetarëve të mos klikojnë në linke të dërguara përmes SMS-ve, WhatsApp-it apo aplikacioneve të tjera, veçanërisht kur mesazhet vijnë nga numra të panjohur ose të dyshimtë. Gjithashtu, qytetarët këshillohen të mos ndajnë në asnjë rrethanë fjalëkalimet, kodet OTP, PIN-in apo të dhënat e kartës bankare.
Përpara hyrjes në shërbimet bankare online, duhet kontrolluar me kujdes adresa e faqes së internetit dhe të përdoren vetëm kanalet zyrtare të bankës. Policia thekson se bankat nuk kërkojnë të dhëna konfidenciale përmes linkeve të dyshimta.
“Mos klikoni në linke të dërguara përmes SMS-ve, WhatsApp-it apo aplikacioneve të tjera të komunikimit, veçanërisht kur mesazhi vjen nga numra të panjohur ose të dyshimtë. Mos jepni asnjëherë fjalëkalimet, kodet OTP, PIN-in apo të dhënat e kartës bankare. Përpara se të identifikoheni në shërbimet bankare, kontrolloni me kujdes adresën e faqes së internetit dhe sigurohuni që po përdorni kanalet zyrtare të bankës. Bankat nuk kërkojnë të dhëna konfidenciale përmes linkeve të dyshimta. Për çdo paqartësi, kontaktoni bankën vetëm përmes numrave dhe kanaleve të saj zyrtare”, njofton policia.
