Policia e Shtetit u ka bërë thirrje qytetarëve që të bëjnë kujdes nga mashtrimet online që synojnë marrjen e aksesit në llogaritë “WhatsApp” përmes mesazheve dhe linkeve mashtruese.
Sipas Policisë, mashtruesit dërgojnë linke me pretendime të ndryshme, si votime në konkurse apo konfirmime veprimesh, dhe më pas u kërkojnë përdoruesve kodin 6-shifror të verifikimit të WhatsApp-it. Ky kod u mundëson atyre të marrin kontrollin e llogarisë në një pajisje tjetër.
Policia u bën thirrje qytetarëve që të mos klikojnë linke të dyshimta, të mos ndajnë me askënd kodin e verifikimit dhe të aktivizojnë funksionin “Two-Step Verification” në WhatsApp.
Në rast se dyshohet se llogaria është komprometuar, qytetarët duhet të veprojnë menjëherë për rikuperimin e saj dhe të njoftojnë kontaktet e tyre.
