Kryeministri Edi Rama ka theksuar se qeveria nuk do të tërhiqet përballë opozitës së Sali Berishës, e cila ka lajmëruar protestë para Kryeministrisë më 6 dhjetor, ditën kur në Tiranë mbërrijnë liderët e Europës në kuadër të Samitit të BE-së.
“Këtu nuk ka palë që tërhiqen ose nuk tërhiqen. Këtu ka një aktivitet që është më i rëndësishmi në historinë e marrëdhënieve ndërkombëtare të Shqipërisë. Nuk ka ndodhur kurrë që në Shqipëri të zbresë gjithë kontinenti në mbështetje të Shqipërisë dhe asaj linje të kristalizuar që e sheh Shqipërinë si faktor kyç në rajon dhe përmes rajonit pastaj edhe në Europë.
Këta (opozita) nuk mund ta marrin peng Shqipërinë, aq më tepër një samit të këtyre përmasave. Këtu hyn në fushë siguria dhe garanitmi i masave të kërkuara të liderëve dhe delegacioneve të gjithë Europës”, deklaroi Rama.
