Kreu i PS, Edi Rama ka marrë pjesë sot në një takim elektoral në Mallakastër, ku është prezantuar kandidati socialist për kryetar bashkie, Qerim Ismailaj.
Teksa ka folur mes dhjetra mbështetësve socialistë, Rama nuk ka kursyer as batutat dhe epitetet për kundërshtarët politikë. Ai i bëri thirrje demokratëve të mos votojnë për koalicionin Meta-Berisha, duke thënë se është më mirë të mos votojnë fare sesa për ta.
“Pse mo Like Floririn do votoni ju? Mendohu, mendohu se njëherë e hëngrët, i vajtët mbrapa kushedi sa vite një komunisti anti-komunist. Pastaj na thoni ne socialistëve që jemi komunist, unë s’kam qenë. Por deri te likja vallhi, është pak si e rëndë. Kurseja gjyshit rrotullimin në varr, kur të bësh kryqin atje te Like Floriri. Kështu që ne mund të mos jemi më të mirët, por kalë karroce për ta çuar vendin më para se ne socialistët nuk gjen dot. Se në fund të fundit zgjedhja është çfarë kali do merrni për katër vitet e ardhshme”, tha Rama.
