Gjykata Speciale Anti-korrupsion ka zbardhur vendimin për rrëzimin e kërkesës së Fredi Belerit për një leje nga drejtoria e burgjeve në mënyrë që të betohej.
Pas zbardhjes së vendimit kryeministri Rama bën të qartë se nuk do e shkarkojë Belerin nga detyra pa përfunduar gjyqi. Por edhe nënvizon se Jorgo Goro nuk mund të qëndrojë më në zyrën e kryetarit të bashkisë së Himarës.
Por si zgjidhet ky ngërç? Në vendimin e gjykatës, thuhet se zgjidhja është te gjetjet e një analize të modeleve europiane në zgjidhjen e ngërçeve të ngjashme, kur pushteti vendor nuk është në gjendje të ushtrojë detyrën. Sipas gjykatës speciale, në këtë rast qeveria qendrore e cila ndërhyn për të siguruar vazhdimësinë e shërbimeve publike. Gjykata thotë se i takon qeverisë që të gjejë zgjidhje.
Burime pranë qeverisë thonë se ende nuk ka një vendim final por të gjitha opsionet janë të hapura. Ndërkohë duket që më i mundshmi është që të jetë qeveria ajo që do emërojë një person në krye të Himarës deri në fund të gjyqit. Kjo mund te jete një ‘mundësi e artë’ e qeverisë për të zgjidhur edhe ngërçin me Greqinë.
