Mbështetja e sektorit bankar me likuiditet nga Banka e Shqipërisë ka arritur nivelet më të larta historike në muajin shtator-tetor.
Statistikat tregojnë se në fund të muajit tetor, huaja nëpërmjet marrëveshjeve të anasjella të riblerjes (REPO) arriti në 62.5 miliardë lekë, vlera më e lartë e raportuar ndonjëherë nga banka qendrore. Në raport me të njëjtën periudhë të një viti më parë, vlera e raportuar e financimit me REPO është në rritje me pothuajse 41%.
Huamarrja e bankave në Bankën e Shqipërisë zakonisht kryhet nëpërmjet instrumentit të marrëveshjeve të anasjellja të riblerjes, ndërsa instrumentet e tjera, si, për shembull, kredia njëditore, kanë një përdorim më të rrallë.
Sipas të dhënave të Bankës së Shqipërisë, kredia në lekë është rritur ndjeshëm këtë vit, ndërsa depozitat në monedhën vendase janë praktikisht në stanjacion. Sektori financiar ndodhet në një moment kur likuiditeti në Euro është mjaft i bollshëm, për shkak të rritjes së lartë të depozitave në monedhën europiane (rritje vjetore me 16.5% në fund të muajit shtator, ndërsa si rrallë herë, likuiditeti në lekë paraqitet më i shtrënguar.
Kjo mund të jetë gjithashtu një nga arsyet që kanë çuar në forcimin e mëtejshëm të Lekut në kursin e këmbimit me Euron.
