Pas udhëtimit të Sali Berishes në Amerikë ku qëndroi për gati një javë, mësohet se kryeministri Edi Rama do të kalojë së shpejti oqeanin, ku mësohet se do të pritet nga vetë presidenti amerikan Donald Trump.
Në kuadër të Asamblesë së Përgjithshme të OKB-së, kreu i qeverisë shqiptare do të niset drejt Amerikës ku dhe pas pritjes nga presidenti i SHBA-ve dhe shkrepjes së fotos zyrtare, thuhet se do të marrë pjesë në darkën e ditës së fundit me gjithë liderët botërorë.
Ky është udhëtimi i dytë i kryeministrit Edi Rama në drejtim të Amerikës, pasi pas mbledhjes së Bordit të Paqes që u mbajt në shkurt, kryeministri do të takohet për të dytën herë brenda vitit me Trump dhe liderët botërorë. Burime për mediat bëjnë me dije se kryeministri i vendit do të udhëtojë drejt SHBA-së për të marrë pjesë në Asamblenë e Përgjithshme të Kombeve të Bashkuara në New York, takim i cili do të nisë më 22 dhe mbyllet më 28 shtator.
Ndryshe nga herët e tjera, këtë vit nuk do të jetë presidenti Begaj ai që do të përfaqësojë Shqipërinë por vetë kryeministri Rama i cili paraprakisht thuhet se pritet të mbajë fjalën gjatë paradites së 25 shtatorit, me orarin amerikan. Mirëpo kjo nuk mbetet agjenda e vetme e kryeministrit. Raportohet se kreu i qeverisë shqiptare do të zhvillojë takim me shqiptarët që jetojnë në Miçigan më 20 shtator.
Po ashtu, burime për A2CNN bëjnë me dije se Rama është ftuar në Galanë e Komunitetit Shqiptar në New York më 24 shtator, ku i pranishëm thuhet se do të jetë dhe lideri demokrat, Sali Berisha. Këshilli i Marrëdhënieve Shqiptaro-Amerikane do të organizojë mbrëmjen e dytë vjetore të Galasë, ku të ftuar do të jenë dhe liderët e Ballkanit Perëndimor. Gjatë eventit bëhet me dije se Edi Rama pritet të dekorohet edhe Presidenti i SHBA-së, Donald Trump, me çmimin “Kalorës i Urdhrit të Skënderbeut”.
Bëhet me dije se përgatitja e Galasë së këtij viti pritet të bashkojë liderë politikë, diplomatë dhe përfaqësues të komunitetit me në fokus vlerësimin e diasporës dhe forcimin e partneritetit strategjik mes ShBA-ve dhe Shqipërisë.
