Profesor Rexhep Qosja vlerëson Edi Ramën për mënyrën si ai bën politikë, përvojën që ka, gjuhën e vendosur brenda dhe jashtë kufijve, por gjithashtu akademiku i njohur ka dy këshilla specifike për të.
“Unë kam thënë që e përkrah Edi Ramën, për një sërë qëndrimesh që ka. Ai së pari ka sjellë një frymë të re në politikën shqiptare në përgjithësi. Ka sjellë një qëndrim më të vendosur në politikën ndërkombëtareKa sjellë gjithashtu edhe një shije të re. Ndaj unë kam menduar dhe mendoj, që Edi Rama, me gjithë gabimet e tij, disa prej të cilave nuk i pranoj, është i nevojshëm për Shqipërinë”, tha fillimisht Profesor Qosja në intervistë për “Dritare TV”.
“Me përvojën që ka, dijen, kulturën, dijen e gjerë, komunikimin e tij të lirë që ka brenda në atdhe dhe me ndërkombëtarët. Ajo që Edi Rama ka thënë në Serbi për Kosovën, lirinë dhe Pavarësinë e saj, nuk e ka thënë askush. Askush, si ai. Një këshillë kam: Mos e mbithekso faktorin si kryeministër. Mos u jep të drejtë disave për atë që unë nuk e them: ato janë sjellje diktatoriale. Unë nuk e them dot këtë. Dhe sugjerimi i dytë, të rrisë moshën e përfaqësuesve të PS dhe deputetëve të PS në Kuvendin e Shqipërisë. T’u krijojë hapësirë edhe personave në moshë”, u shpreh Qosja.
