Njësia e Antiterrorit në Policinë e Shtetit ka rritur gatishmërinë në institucionet diplomatike në vendin tonë. Prezenca e agjenteve të Antiterrori është shtuar në Rinas dhe në çdo pikë doganore.
Në bashkëpunim me SHISH merren informacione për persona që mund të kenë prirje për akte dhune apo qëllime terroriste të mos lejohen të futen në territorin shqiptar.
Sipas burimeve nga Ministria e Brendshme për këto masa shtesë nuk kanë vend për panik, por merren gjithmonë dhe janë rutinë sa herë ka informacione nga përfaqësitë diplomatike për rritje të sigurisë, por edhe kur në vendin tonë janë zhvilluar samite të rëndësishme me pjesëmarrje të liderëve europianë.
Këto masa shtesë vijnë një ditë pas paralajmërimit të Ambasadës Amerikane, që ngriti alarmin se grupe të lidhura me Iranin mund të sulmojnë godina të lidhura me SHBA-të, sheshe dhe vende publike në Shqipëri.
Ndërkohë, në kampin e muxhahedinëve në Manëz, apo i quajtur si “Ashraf 3” situata paraqitet e qetë. Nga komunikimi me përfaqësuesit brenda kampit ku ndodhen rreth 2700 anëtarë të opozitës iraniane, deklarata e ambasadës amerikane, është në vazhdën e të gjitha komunikimeve që trupa diplomatike ka bërë dhe bën në të gjitha vendet ku ka përfaqësi të saj, asgjë specifike me Shqipërinë.
Po ashtu, burime pranë policisë se shtetit, bëjnë me dije se kampi ka patur që në krye të herës vëmendje dhe plan të veçantë masash sigurie, ndërkohë që është shtuar vigjilenca, por nuk ka të dhënë për rrezik konkret
