Shpenzimet buxhetore për programin e transportit rrugor parashikohet të pësojnë rritje gjatë 3 viteve të ardhshëm.
Sipas programit buxhetor afatmesëm 2026-2028, për vitin 2025 fondet e buxhetit për financimin e këtij programi ishin 33.48 mld lekë, ndërsa për vitin 2026 parashikohet rritje me 2 mld lekë, duke arritur në 35.48 mld lekë.
Për vitin 2027 shpenzimet buxhetore për transportin rrugor parashikohet gjithashtu të rriten, duke shkuar në 37.95 mld lekë, ndërkohë që për vitin 2028 tendenca është në rënie në raport me 2027-ën, por në krahasim me vitin aktual shpenzimet parashikohen të jenë në rreth 36 mld lekë apo 2.6 mld lekë më shumë se viti aktual.
Sipas dokumentit, programi “Transporti Rrugor” synon të garantojë 3,522 kilometra rrugë të mirëmbajtura sipas standardeve kombëtare në të gjithë territorin gjatë periudhës 2026–2028. Brenda vitit 2026, parashikohet që 407 kilometra rrugë të jenë ndërtuar ose rehabilituar, sistemuar, asfaltuar dhe të pajisura me sinjalistikë rrugore.
Për periudhën afatmesme, qeveria parashikon që financimi për disa projekte rrugore të vijojë nga buxheti i shtetit, në përputhje me kontratat ekzistuese të formuluara sipas modeleve të miratuara të financimit. Konkretisht, bëhet fjalë për 3 kontratat e koncesionit për ndërtimin e Rrugës së Arbrit, të Rrugës Milot–Morinë dhe për rrugën Orikum – Dukat.
Gjithashtu, do të vijojë financimi për zgjerimin e superstradës Tiranë – Durrës dhe aksit Tiranë – Ndroq – Plepa, për segmentet Elbasan – Lekaj dhe Elbasan – Qafë Thanë, që janë pjesë të korridorit VIII, për rrugën Berat – Ballaban, si dhe për Bypass-in e Sarandës.
