Vajza e Azem Hajdarit, Rudina Hajdari është larguar nga angazhimi aktiv në PD, pasi zëri i saj nuk është dëgjuar nëpër forumet e brendshme të PD.
Hajdari tha se ka kërkuar reformim të PD në Këshillin Kombëtar dhe në përrvjetorin e 32-të të PD-së, por kërkesat e saj nuk janë marrë parasysh dhe sot opozita nuk është aty ku duhet të jetë. Ajo shtoi se e shikon të vështirë rotacionin politik vitin e ardhshëm.
“Edhe sot nuk shikoj njerëz shumë të frymëzuar që të tregojnë se opozita është në vendin dhe kohën e duhur për të bërë ndryshimin. Unë kam qenë nga ato pak zëra të brendshëm, jo të jashtë, pra që nuk kam dashur ta dëmtoj PD dhe kur kam shprehur një mendim, e kam shprehur në forumet tona të brendshme, në Këshillin Kombëtar, ku kam shprehur mendimin tim përsa i përket rrugëtimit që PD duhet të ketë. Përshembull në 11 dhjetor para dy viteve, në 32 vjetorin e PD, unë thashë në fjalën time se PD duhet të reformohet që të jetë më bashkëkohore. Nuk e shikoj këtë reformim me syrin tim. PD nuk është aty ku duhet të jetë. Viti tjetër është një vit zgjedhor dhe duke marrë parasysh edhe kohën, e shikoj të vështirë rotacionin”, tha Hajdari.
