Kryengritja e Ervin Salianjit duket se ka nxitur një reagim brenda Partisë Demokratike, duke aktivizuar jo vetëm bazën e gjerë demokrate, por edhe figura të afërta me Sali Berishën.
Takimi i tij i parë, i mbajtur dy ditë më parë në Durrës, ka mbledhur një numër të konsiderueshëm demokratësh dhe ish-funksionarësh, duke sinjalizuar pakënaqësi të theksuar ndaj gjendjes aktuale të partisë dhe kërkesën për një analizë të thellë.
Ndonëse Berisha u shpreh i “pa shqetësuar” nga lëvizja e ish-deputetit, ai reagoi menjëherë duke dhënë një urdhër të prerë që të nisë analiza në çdo strukturë të PD-së.
Por presioni mbi Berishën nuk kufizohet vetëm te takimet politike. Frikës së tij për mbështetjen që mund të fitojë Salianji i shtohet edhe një element i ri, interesi publik. Sipas të dhënave të Google Trends për periudhën 5 nëntor – 4 dhjetor 2025, të publikuara nga eksperti i IT-së Besmir Semanaj, Ervin Salianji ka tejkaluar Sali Berishën në kërkimet që qytetarët shqiptarë kanë bërë në Google. Kjo është hera e parë që një figurë brenda Partisë Demokratike e kalon Berishën.
“Të dhënat e Google Trends për Shqipërinë (5 nëntor – 4 dhjetor 2025) tregojnë një zhvillim të pazakontë, por shumë domethënës politikisht: Ervin Salianji rezulton figura e parë brenda Partisë Demokratike që e kalon Sali Berishën në interesin publik në kërkimet në Google.
Nuk flasim për opinion, por për matje konkrete të vëmendjes së njerëzve në kohë reale. Kur grafiku i kërkimeve e çon një emër mbi liderin historik të një partie, kjo do të thotë se publiku po zhvendos fokusin. Dhe kjo zhvendosje nuk ndodh pa arsye.
Rritja e Salianjit në kërkime përkon me zhvillimet e fundit në PD dhe me aktivizimin e tij publik: takime me figurat më të votuara të primareve/listave të hapura, reagime politike të drejtpërdrejta dhe një profil që po qarkullon gjerësisht në media e rrjete sociale. Pra, interesi nuk është rastësor — është i lidhur me ngjarje dhe rol politik aktiv.
Google Trends nuk zgjedh kryetar partie, por tregon qartë ku shkon vëmendja e publikut. Sot, sipas këtij matësi, vëmendja brenda kampit opozitar është duke u riorientuar”, shkruan eksperti i IT.
