Grupi BALFIN i drejtuar nga sipërmarrësi Samir Mane, njofton se ka blerë ish-ndërtesën “Hertie-Haus”, një objekt ikonik prej 26,000 m² në zemër të Mynihut, pikërisht pranë “München Hauptbahnhof” – një prej stacioneve hekurudhore më të frekuentuara në Evropë.
Lajmin emocionues e jep vetë Samir Mane, i cili zbulon dhe vizionin për të krijuar ndërtesën tregtare historike të kategorisë “Class A” më të mirën në botë.
“Plani ynë është ta rinovojmë plotësisht pronën dhe t’i rikthejmë jetën, duke ruajtur njëkohësisht karakterin historik që e bën atë kaq të veçantë”, shkruan ai.
“Mynihu është një nga qendrat më të rëndësishme ekonomike të Gjermanisë dhe selia e më shumë kompanive të listuara në indeksin DAX sesa çdo qytet tjetër gjerman”, thekson sipërmarrësi Samir Mane.
Kreu i Grupit BALFIN thotë se Mynihu është vendi ku historia e pasur takohet me një komunitet të gjallë sipërmarrësish inovativë, dhe ata janë krenarë që bëhen pjesë e kapitullit të tij të ardhshëm.
“Mezi pres të bëj edhe shumë vizita të tjera në këtë qytet të mrekullueshëm. Tani, më në fund, kam justifikimin e përsosur për të marrë pjesë në Oktoberfest”, përmbyll Samir Mane, teksa jep lajmin emocionues.
