Qeveria Shqiptare akordoi një fond prej 4 milionë eurosh për mbarëvajtjen e koncertit të artistit me famë botërore Kanye West, një aktivitet që kryeministri dhe ministrat e kanë konsideruar ndër ngjarjet kulturore dhe artistike më të rëndësishme të viteve të fundit.
Vendimi ka nxitur reagime të shumta në rrjetet sociale, ku një pjesë e qytetarëve e kanë përshëndetur si një investim në promovimin e vendit, ndërsa të tjerë e kanë kritikuar përdorimin e fondeve publike për një koncert.
Pas debatit të krijuar, kryeministri Edi Rama reagoi sërish në rrjetet sociale, duke mbrojtur vendimin e qeverisë. Sipas tij, fondi u miratua në minutën e fundit për të shmangur një dështim organizativ që sipas tij, do ta vinte Shqipërinë në pozitë të vështirë përballë rreth 25 mijë vizitorëve nga afro 80 shtete, të cilët kanë siguruar prej kohësh biletat për koncertin.
Sipas asaj që kreu i qeverisë shkruan ky event pritet të ketë ndikim në ekonominë shqiptare, duke sjellë rreth 100 milionë euro të ardhura për vendin.
“4 MILIONË EURO në minutën e fundit, për të mos turpëruar Shqipërinë, në sytë e afro 25 mijë të huajve nga 80 shtete që gjermësot kanë blerë me kohë biletat për Kanye West; për të mos humbur një mundësi fantastike promovimi të Shqipërisë Turistike, për një nga komunitetet më të mëdha të botës, dashamirët e muzikës; për të stimuluar ekonominë, e cila sa për një shembull, sipas UEFA-s, pati një hyrje prej 160 milionë eurosh nga Finalja e Conference League-s, ndërkohë që nga ky koncert – në kushtet e vështirësuara artificialisht prej dështakzemërakëve – ne llogarisim jo më pak se 100 milionë euro të ardhura. Mjafton të shihet shpërthimi i rezervimeve në booking.com për të premten, të shtunën e të dielën, për të krijuar një ide të përfitimit direkt ekonomik për familjet, biznesin dhe arkën e bashkisë e të shtetit, nga rritja e konsumit, pa llogaritur këtu fare përfitimin e shtrirë në kohë”, shkruan Rama.
