Situata vijon të jetë dramatike në pallatin te “5 Maji” i cili është përshirë nga flakët këtë pasdite të marte. Ndërkohë Drejtori i Përgjithshëm i Policisë së Shetetit Skënder Hita, ka mbërritur në vendngjarje.
Në videon e siguruar nga Newsbomb.al, kryepolici duket të jetë aty. Ndërkohë që raportohet se në vendngjarje është edhe Ministri i Punëve të Brendshme Besfort Lamallari.
Një punë heroike është duke u bërë edhe nga Forcat Zjarrfikëse të Tiranës, pasi efektivët e reparteve po bëjnë gjithçka për të fituar kohë e për të shpëtuar çdo jetë, teksa janë në luftë me flakët.
Siç shihet dhe nga pamjet, disa nga efektivët madje nuk kanë pritur as që bombulat e oksigjenit të zëvendësohen, por kanë vrapuar përmes autoshkallës për të hyrë brenda apartamenteve në katet e sipërme dhe për të shpëtuar banorët.
Për shkak të materialeve plastike të fasadës, zjarri rindizet herë pas here, pavarësisht se zjarrfikësit mundohen të izolojnë vatrën. Rrezik ka dhe për kalimtarët dhe ekipet e emergjencave që janë në zonë, pasi materialet shkëputen vazhdimisht nga katet e sipërme dhe bien në tokë.
