Debati i tij gjatë seancës së kaluar Parlamentare me Niko Peleshin, mund ti kushtojë Gazment Bardhit 30 ditë përjashtim nga Kuvendi.
Socialistët kanë bërë një kërkesë, përmes së cilës këkrojnë që Bardhi të moj jetë pjesë e seancave parlamentare për një muaj, pasi sipas tyre ofendoi kreun e Kuvendit Niko Peleshin. Për të shqyrtuar kërkesën e PS ditën e hënë më 9 e 30 do të mblidhet Komisioni i Etikës.
“Gazment Bardhi ndërhyri në mënyrë të përsëritur me tone agresive, duke ndërprerë folësin, duke përdorur fjalë shumë të rënda fyese ndaj Kryetarit të Kuvendit, veprime këto që përbëjnë shkelje të rëndë të Rregullores së Kuvendit dhe të etikës parlamentare”, thuhet në kërkesën e socialistëve.
Kujtojmë se përplasja e Gaz Bardhit me Niko Peleshin në seancën e së enjtes erdhi për shkak të procedurës, teksa para ligjvënësve raportonte Komisioneri për Mbrojtjen nga Diskriminimit. Bardhi kërkoi që të ishin vetë deputetët që të parashtronin në seancë pyetjet për Komisionerin, por Peleshi refuzoi duke iu përmbajtur vetëm pyetjeve me shkrim të dorëzuara më herët nga deputetët. Peleshi kërkoi përjashtimin e Bardhit nga salla por për shkak të refuzimit të këtij të fundit, u kalua në votim dhe u mbyll seanca.
