Kreu i Partisë së Lirisë, Ilir Meta i ka dalë në krah Sali Berishës pas vendimit të SPAK për të marrë të pandehur ish-kryeministrin lidhur me privatizimin e ish-kompleksit sportiv “Partizani”.
Askush nuk priste një deklaratë tjetër, prandaj Meta shprehet se ‘drejtësia me regji ka ndërmarrë akte antikushtetuese dhe të paligjshme ndaj Berishës’.
“Drejtësia me regji ka ndërmarrë veprimet e saj antikushtetuese dhe të paligjshme ndaj Kryetarit të Partisë Demokratike, Prof. Dr. Sali Berisha me urdhër politik të Edi Ramës. Këto veprime, që kanë shkelur me këmbë edhe Parlamentin e Shqipërisë, kërkojnë shmangien e vëmendjes nga korrupsioni dhe përgjegjësitë shumë të rënda personale të Edi Ramës për aferën e inceneratorëve dhe mjaft aferave të tjera qindra milionëshe. Qëllimi politik i vetëm është shantazhi dhe intimidimi i opozitës”, shprehet Meta.
Mbrëmjen e të shtunës është arrestuar në aeroportin e Rinasit Jamarbër Malltezi, dhëndri i Sali Berishës. Arrestimi është bërë me urdhër të SPAK, pas kallzimit të bërë në vitin 2020 nga Ministri i Brendshëm Taulant Balla lidhur me privatizimin e ish klubit sportiv “Partizani”.
