Teuta Zyberi është 28-vjeçarja që paradite ushtron detyrën si specialiste në Bashkinë e Tiranës, ndërsa mbrëmja e gjen në timonin e një taksie.
“Makinën e kam pasion edhe nisur nga ky pasion që kam mendova të punoj taksiste duke pasur parasysh që gjithë Tiranën e njoh. Kam njohuri të mëdha të terrenit, ndërtesat, apo lokacionet e përherëshme të klientëve”, tregon Teuta.
Kur i tregoi për herë të parë familjes se kishte vendosur të bëhej taksiste, ata e morën me shaka, ndërsa miqve dhe kolegëve Teuta në fillim hezitoi t’i tregonte.
“Në fillim qeshën, nuk e besonin që unë do ta bëja taksisten. Mamin dhe babin e kam pasur mbështetje, por që gjithmonë është ai meraku i prindërve që vajza do jetë gjatë gjithë kohës në lëvizje, jo aksidente. Në fillim nuk i kam thënë asnjeriu përveç familjes. E mendova këtë pjesën që do më paragjykonin, por tani e kanë pritur mirë. Shqetësimi im i vetëm është se duhet të punoj në orë të vona. Unë jam rritur me parimin se puna nuk është turp nëse është e ndershme dhe nuk cënon njeri. Dua që edhe partneri im në të ardhmen të mos ketë paragjykime”, tregon Teuta.
