Ilir Meta ka qenë në qendër të mediave këtë të hënë, ku pas një periudhe të gjatë në paraburgim, ai u shfaq për herë të parë në publik gjatë seancës së parë në themel të procesit gjyqësor ndaj tij dhe ish-bashkëshortes, Monika Kryemadhi.
Paraqitja e ish-presidentit në sallën e gjyqit tërhoqi menjëherë vëmendje, jo vetëm për rëndësinë e procesit, por edhe për ndryshimin e dukshëm në pamjen e tij.
I dobësuar ndjeshëm dhe me flokët e thinjur të prerë shumë shkurt, Meta u shfaq ndryshe nga imazhi që publiku kishte krijuar ndër vite.
Pas përfundimit të seancës, Meta zhvilloi dhe një intervistë telefonike nga paraburgimi për emisionin “Breaking”. Në prononcimin e tij, ai ngriti shqetësime lidhur me trajtimin e çështjes dhe pretendoi se i është mohuar e drejta e fjalës, duke theksuar se ende nuk është njohur me vendimin e zbardhur të autoriteteve.
“Kjo është përmbysje e praktikave demokratike. Tani e ka detyrim se Konventa Europiane prevalon mbi Kushtetutën. Përshembull, po bëhet viti dhe mua s’më është dhënë vendimi i zbardhur.Ju keni rekomandimet e avokatit të popullit. Kolegët kanë bërë kërkesa dhe drejtoria e burgjeve nuk i lejon. I dënuari përjetë në Australi ka dhënë intervistë televizive. Të gjithë nga kafazi kanë folur. Të drejtën ta jep kushtetuta. Komitetit të Helsinkit i kishin thënë se bëja ajrosje dy herë në ditë”, tha Meta, ndërkohë që kjo intervistë nuk zgjati shumë pasi telefonata me të u ndërpre papritur.
