Gazetari i Euronews Albania në Vlorë, Algert Harizi tregoi se numri i turistëve të huaj që kanë zgjedhur të pushojnë në Vlorë këtë verë është i madh.
Por ndryshe nga vitet e tjera, turistët e këtij viti në Vlorë kanë ndryshuar sjellje; janë turistë që nuk shpenzojnë shumë, duke nisur që nga shmangia e hoteleve për apartamente me qira apo frekuentimi i plazheve publike dhe refuzimi i çadrave dhe shezlonëve me pagesë.
“Jemi në kulmin e sezonit turistik në qytet, 20 korrik-20 gusht është dyndja më e madhe e pushuesve. Këtë vit ka më shumë të huaj se shqiptarë, në Lungomare flitet vetëm gjuhë e huaj, ka polakë, gjermanë, italianë por janë turistë që nuk shpenzojnë shumë, preferojnë banesat me qira në qytetin e Vlorës, nuk shkojnë në hotele. Ka ndryshuar sjellja e turistëve, duke qenë se edhe bizneset i kanë rritur çmimet e hoteleve, ata janë drejtuar tek apartamentet. Një apartament në Vlorë e gjen 30-50 euro, preferojnë të gatuajnë vetë, shmangin restorantet dhe luksin. Ky lloj turizmi dominon tani në Vlorë, por edhe në plazhet e qytetit të Vlorës të huajt nuk preferojnë të shkojnë te çadrat dhe shezlonët me para, të cilat preferohen më shumë nga shqiptarët”, tha gazetari.
