Për herë të parë në një spital publik në Shqipëri, në Spitalin Rajonal Memorial Fier është realizuar me sukses një ndërhyrje e avancuar për zhbllokimin e arterieve të zemrës.
Mjekët aplikuan teknikën koronare perkutane me qasje retrograde dhe metodën “reverse CART”, një procedurë e specializuar që përdoret në rastet kur arteriet koronare janë të bllokuara në mënyrë të tillë që nuk mund të hapet me metoda të zakonshme.
Kjo teknikë u mundëson mjekëve të arrijnë te bllokimi përmes një rruge alternative brenda enëve të gjakut, duke rikthyer qarkullimin normal të gjakut në zemër pa qenë e nevojshme kryerja e një operacioni në zemër të hapur.
Sipas Ministrisë së Shëndetësisë dhe Mbrojtjes Sociale, ndërhyrja u krye te një pacient 72-vjeçar, i diagnostikuar me sëmundje komplekse të arterieve koronare dhe me risk shumë të lartë.
Procedura u realizua nga dr. Amarildo Voci, në bashkëpunim me ekipin e hemodinamikës së Spitalit Rajonal Memorial Fier, të përbërë nga dr. Ndriçim Kallashi, dr. Marsjon Qordja, dr. Briand Shehu dhe infermieri Ermir Tajari.
