Janë zyrtarizuar kandidaturat për postin e Prokurorit të Përgjithshëm, pas hapjes së garës nga Këshilli i Lartë i Prokurorisë (KLP). Procesi vjen në prag të përfundimit të mandatit të Prokurorit të Përgjithshëm, Olsian Çela, i cili mbyllet në muajin dhjetor.
Sipas burimeve të gazetarit të A2 CNN Igli Çelmeta, në garë janë pesë kandidatë: Fatjona Memçaj, prokurore në Eurojust, aktualisht në mandatin e saj të dytë; Arta Marku, ish-Prokurore e Përgjithshme e përkohshme; Ylli Pjetërnika; Rovena Bozo, prokurore pranë Prokurorisë së Tiranës; si dhe Adnan Xholi, prokuror në Prokurorinë e Posaçme kundër Korrupsionit dhe Krimit të Organizuar (SPAK).
Ndërkohë, kreu i Prokurorisë së Elbasanit, Kreshnik Ajazi, kishte depozituar më herët kandidaturën e tij, por më pas vendosi të tërhiqej nga gara.
