Zëvendëskryeministrja Belinda Balluku ka reaguar pas deklaratës së Sali Berishës për protestë më 6 dhjetor, ditën kur në Tiranë do të vijnë drejtuesit e lartë të shteteve anëtare të Bashkimit Europian.
Ministrja Balluku thotë se kushdo që ka patur dyshime mbi veprimet e “non gratave” në aktivitetin politik, tashmë e ka para syve provën e pakundërshtueshme të qëndrimeve antieuropiane.
“Shqipëria drejt Evropës, antishqiptaria në aksion. Kushdo që mund të ketë pasur qoftë edhe një fije dyshimi mbi veprimet e “non gratave”, në gjithë aktivitetin e tyre politik, tashmë e ka përpara syve provën e pakundërshtueshme të synimeve dhe qendrimeve antieuropiane. Po çirret për portin e Durrësit, se aty ka koncesionet e familjes që i ka marrë si hajn ndërkohë që shqiptarët i kishin prerë biletën e ikjes pa kthim në verën e 2013. Dhe sot po tenton të ngrihet nga varri politik dhe një herë për të shkatërruar këtë vend. Po fati i madh për Shqipërinë dhe shqiptarët është se nuk ka më fuqi rublash që mund t’i ngrejë nga varri politik këta lloj monstrash“, shkruan nder te tjera Balluku.
