Të gjithë personat që kanë mbushur moshën e pensionit dhe vijojnë të punojnë të regjistruar si të vetëpunësuar nuk do të paguajnë më sigurime shoqërore.
Efektet e përjashtimit nga pagesat e kontributit për sigurimet shoqërore te pensionistët e “vetëpunësuar” si të vetëm në sektorin privat do te llogariten nga 1 Prilli 2023.
Me hyrjen në fuqi të ndryshimeve ligjore, përjashtimin e kësaj kategorie vetëm nga sigurimet shoqërore, pagesat për sigurimet shëndetësore për periudhën 3-mujore (prill-maj-qershor) janë në vlerën e rreth 8,200 lekëve nga rreth 33,000 lekë që paguhej më parë për periudhën 3-mujore.
Drejtoria e Tatimeve sqaroi për Monitor se “Për të vetëpunësuarit e vetëm si pensionist duke zgjedhur kategorinë i vetëpunësuar që përfiton nga pensioni i pleqërisë nuk paguajnë kontributet për sigurimet shoqërore. Ndërsa për sigurimet shëndetësore paguajnë mbi dyfishin e pagës minimale pra me 2,720 lekë”.
Nga kjo nismë përfitojnë rreth 1.500 të moshuar të pensionit të pleqërisë të vetëpunësuar në sektorin privat, të cilët deri më tani kanë derdhur çdo muaj rreth 9500 lekë për efekt të sigurimeve shoqërore. Pas miratimit të këtij ligji të ri kjo kategori pensionistësh do të kenë më shume të ardhura në familjet e tyre.
