Kryeministri Edi Rama ka komentuar ngjarjet në veri të Kosovës dhe vrasjen e efektivit të policisë së Kosovës nga terroristët serbë.
Rama theksoi se për herë të parë se në 10 vitet e fundit qeveria e tij nuk është linjëzuar me Bashkimin Evropian të cilëve u ka bërë thirrje që të dënojnë Serbinë për vrasjen e efektivit të policisë së Kosovës.
“Ky qëndrim ynë nuk është pritur mirë nga Brukseli”, u shpreh kryeministri Edi Rama, por “nuk do të ndryshojë pa dalë deklarata që ne presim”.
“Për herë të parë, në të paktën 10 vitet e fundit, Shqipëria nuk u linjëzua me një deklaratë të politikëës së Jashtme të BE-së. Ky fakt ka shkaktuar një përshtjellim. Jemi përpjekur që pardje që deklarata të reflektonte edhe zhvillimet dramatike të ditëve të fundit, konkretisht vrasjes e Afrim Bunjakut dhe shpalljen e zisë në Beograd për vrasjen e sulmuesve. Miqtë në Bruksel na kanë shpjeguar se nuk ishte e mundur diçka e tillë, pasi deklarata ishte konfirmim i vendeve anëtare të BE-së i qëndrimit të Borrel pas takimit të dështuar të 14 shtatorit mes dy liderëve të Kosovës dhe Serbisë në Bruksel.
Kemi theksuar domosdoshmërinë që publikimi i kësaj deklarate duhet të bëhej njëkohësisht, apo të paktën të pasohej nga një deklaratë e dytë mbi zhvillimet e patolerueshme. Na u tha se kjo është e pamundur momentalisht dhe deklarata kritike ndaj Kosovës e kishte marrë të gjithë mbështetjen e vendeve anëtare të BE. Ky qëndrim ynë nuk është pritur mirë nga Brukseli. Jemi të keqardhur për këtë, por qëndrimi ynë nuk ndryshon. Jemi gati të linjëzohemi sapo të dalë deklarata që ne presim. Ky qëndrim ka të bëjë me zhbalancimin total që deklarata e djeshme shkakton në këtë moment dramatik. Situata mund të përshkallëzohet në një përplase të armatosur mes Serbisë dhe Kosovës”, tha Rama.
