SPAK vendosi mbrëmjen e 21 Tetorit masën e sigurisë “detyrim paraqitje” për ish-kryeministrin Sali Berisha, si dhe i është bllokuar pasaporta në kuadër të hetimeve për dosjen që lidhet me privatizimin e kompleksit Partizani.
Krahas masës për Berishën, SPAK urdhëroi arrestimin e dhëndrit të ish-kryeministrit, Jamarbër Malltezit, i cili u ndalua ne Rinas.
Ndërsa pritej një reagim, edhe nga kryetari i PD-së, Lulzim Basha, dikur krahu i tij i djathtë, ky i fundit, ndonëse jo në mënyrë të drejtpërdrejtë duket se mbështet akuzat e Prokurorisë ndërsa kërkon që t’i jepet fund pandëshkueshmërisë.
“Qytetarë të varfër, korrupsion i lartë. Ky është realitetit sot në Shqipëri që po detyron shqiptarët të largohen nga vendi. Prandaj sot është jetike t’i jepet fund pandëshkueshmërisë. Të korruptuarit duhet të japin llogari para drejtësisë e paratë që u kanë marrë shqiptarëve t’u kthehen mbrapsht. Paratë që sot shkojnë në xhepat e pushtetarëve të kthehen në të mira për qytetarët”, shkruan Basha.
