Gazment Bardhi ka thyer heshtjen duke reaguar për vendimin e SPAK-ut që vendosi dy masa sigurimi për Sali Berishën për dosjen e kompleksit “Partizani” që i çoi në burg dhëndrin, Jamarbër Malltezi.
Bardhi thotë se SPAK-u po nxitohet duke kërkuar dy masa për Berishën pa kaluar kërkesën në Kuvend, pasi ish-kryeministri gëzon imunitet. Por Bardhi shprehet i gatshëm te votoje “PRO” në rast se SPAK kërkon heqjen e imunitetit të Berishës.
“Personalisht mbështes pa asnjë rezervë barazinë e cilitdo përpara ligjit. Kur ndaj një deputeti duhet të caktohet një masë sigurimi që kufizon lirinë në çfarëdo lloj forme, prokurori është i detyruar të kërkojë autorizim nga Kuvendi. Dje jam njohur me vendimin e zbardhur të Gjykatës së Posacme kundër Korrupsionit dhe Krimit të Organizuar që cakton në mënyrë të njëkohshme dy masa sigurimi ndaj z. Sali Berisha. Kufizimi i lirisë së lëvizjes së Berishës, pa autorizim të Kuvendit, është një shkelje e rëndë kushtetuese që ngre pikëpyetje të forta mbi arsyet e nxitimit të SPAK. Personalisht do të votoja në favor të çdo kërkese të organeve të drejtësisë që do të vinte në Kuvend” tha Bardhi.
