Pavarësisht hetimit të nisur nga SPAK dhe masës së sigurisë “detyrim paraqitje” dhe bllokim të pasaportës nga GJKKO për çështjen e ish-kompleksit Partizani, Sali Berisha ka vendosur të mos heqë dorë nga aksioni politik.
Megjithëse ndodhet në “mes të hallit”, ditën e mërkurën (25 Tetor), në orën 12:00, Berisha ka njoftuar mbledhja e Kryesisë së PD-së, ku thuhet se do të diskutohet për zhvillimet e fundit politike. Ende nuk dihet nëse do ketë diskutime mbi akuzat nga SPAK ndaj Berishës lidhur me privatizimin e ish-kompleksit “Partizani”.
Ndërsa, ditën e premten, Berisha do mbledhë Këshillin Kombëtar për të diskutuar situatën politikë dhe hapat që do të ndërmerren pas aksionit të SPAK ndaj ish kryeministrit të vënë nën masë sigurie “Detyrim Paraqitje”.
Berisha ka thënë se Partia e tij do të përfshihet, në atë që e quan betejë për opozitarizmin, pasi sipas tij aksioni i SPAK është orkestruar nga Rama për të goditur opozitën.
