Prokuroria e Posaçme ka rihapur dosjen e “21 Janarit” ku humbën jetën 4 protestues: Aleks Nika, Hekuran Deda, Ziver Veizi dhe Faik Myrtaj.
Përmes një njoftimi, SPAK bën me dije se ka regjistruar procedimin penal për vrasjen e Aleks Nikës, si dhe plagosjen e shtetasve Artes Dybeli, Ilia Qesko dhe Ilia Papa në protestën e 11 Janarit të vitit 2011, në bulevardin “Dëshmorët e Kombit”.
Procedimi penal është regjistruar për veprat penale: “Vrasja në rrethana të tjera cilësuese”, e kryer në bashkëpunim, kundër dy ose më shumë personave dhe në mënyrë të rrezikshme për jetën e shumë personave; “Shpërdorim i detyrës”, e kryer në bashkëpunim dhe “Kryerja e veprimeve që pengojnë zbulimin e së vërtetës”, e kryer në bashkëpunim.
Në njoftimin e SPAK thuhet se ky procedim penal është regjistruar në zbatim të vendimit të Kolegjit të Gjykatës së Lartë, e cila vendosi që çështja të hetohet nga Prokuroria e Posaçme pas kallëzimit të Rajmona Nikës, e veja e Aleks Nikës.
Gjykata e Lartë detyroi SPAK-un të regjistrojë procedimin penal për “21 Janarin” dhe të hetojë Sali Berishën, Lulzim Bashën, Ndrea Prendin dhe Agim Llupon.
