Ajola Xoxa, bashkëshortja e kryebashkiakut të arrestuar Erion Veliaj, ka reaguar për herë të parë lidhur me akuzat e ngritura nga SPAK.
Ajola Xoxa u shpreh se ekspertët kontabël kanë kaluar në sitë çdo llogari të saj bankare duke nxjerrë çdo blerje online të 10 viteve të fundit e cila përllogaritet në shifrën e 75 mijë eurove.
Bashkëshortja e Veliajt u shpreh se u “tromaks” nga shifra 800 mijë euro e nxjerrë nga SPAK, ndërsa shtoi se punon prej 17 vitesh.
“Unë fustanët dhe bizhutë 800 mijë euro i kam marrë vesh nga mediat. Ndërsa akt-akuzën qindrafaqëshe e kam marrë vetëm pasi jam akuzuar për këtë shifër tromaksëse dhe për një sërë çudirash të tjera, një ditë përpara se të shkoja në sallën e gjyqit. Totali i blerjeve të mija online që përfshijnë veshje, produkte kozmetike dhe parafarmaceutike, aksesorë, etj. (duke mos përfshirë libra, tarifa dixhitale, abonime), është për 10 vite: 75.025 Euro në total. E kam të qartë që shumëkujt edhe kjo shifër mund t’i duket e madhe, por dua ta theksoj me këtë rast se unë nuk kam lidhje me imazhin e asaj kukullës me 800 mijë euro fustanë dhe bizhu, sepse punoj si juriste dhe avokate prej 17 vjetësh, fillimisht në dy prej studiove më të mëdha të vendit, e më pas me studion time, me një numër të madh klientësh e bashkëpunëtorësh”, shkruan ndër të tjera Ajola.
