Ish-deputeti Lefter Maliqi ka komentuar aktualitetin politik në vend por edhe zgjedhjet e parakohshme në kryeqytet për të cilën tha se opozita po zhvillon takime për të gjetur kandidatin konsensual.
Gjatë intervistës për “News24”, Maliqi tha se vijon procesi i konsultimeve pasi duhet një emër i gjithë pranuar nga opozita.
“Shqiptarët nuk duhet ta hanë këtë propagandë të Rilindjes që opozita nuk ka kandidatë. Ne kemi kandidatë dhe takimet bëhen për të rakorduar emrat. Diskutimet e brendshme bëhen meqë jemi përballë narko-shtetit dhe PD kërkon edhe mendimin e pjesës tjetër të opozitës që të dalim me një emër të përbashkët. E kam thënë se PD dhe opozitës së bashkuar i duhet një punë e madhe paralele në bazë sepse regjimi është në aksion. Unë jam për zgjedhje të reja në Tiranë pasi është kthyer në një narkoshtet, qeveria është kthyer në një sulltanat. Pa organizim në bazë nuk ka fitore, opozita duhet të ketë analizën”, tha Maliqi.
Gjithashtu Maliqi pret që me urdhër të SPAK-ut të arrestohet kryetari i Bashkisë së Kuçovës, Kreshnik Hajdari.
“Edhe unë nga momenti në moment mund të pres që të arrestohet kryetari i Bashkisë së Kuçovës apo të shkarkohet. Unë do të futem në garë, por mendoj se do të jetë më e vështirë se në vitin 2027″, përfundoi Maliqi.
