Partia Demokratike është në kërkim të një kandidati që do të sfidojë Ogerta Manastirliun në zgjedhjet për Bashkinë e Tiranës.
Burime për mediat bëjnë me dije se demokratët janë duke zhvilluar një sërë bisedimesh me partitë opozitare, ku jo më larg se një ditë më parë ata u ulën në tavolinë me Endri Shabanin e “Nismës Thurje” dhe më pas me ish-aleatin e këtij të fundit, Adriatik Lapajn.
Gjithashtu në vijim pritet edhe një takim me kreun e partisë “Mundësia”, Agron Shehajn. Mësohet se ish-deputeti demokrat i ka kushtëzuar ish-kolegëve të vet çdo diskutim me faktin që kandidati i opozitës duhet të vijë nga jashtë strukturave politike, në mënyrë që të ketë një profil të pastër publik dhe shanset për fitore janë më të mëdha.
Një tjetër takim pritet të zhvillohet dhe me Shpëtim Idrizin, ndërkohë që sipas të njëjtave burime mësohet se përzgjedhja e emrit për kandidatin që do qëndrojë përballë Manastirliut është drejt përfundimit.
