Emërimi i Liburn Aliut, ish-ministrit të Albin Kurtit, në krye të Autoritetet Portual të Durrësit ka sjellë një sërë reagimesh.
Së fundmi, ka qenë analisti Fatmir Merkoçi, ai i cili e ka kritikuar emërimin e Aliut në krye të Portit, duke e cilësuar si një “gabim të rëndë”.
Merkoçi shprehu shqetësimin se persona që nuk njohin mjedisin dhe funksionimin praktik të një porti mund të bëjnë ndryshime të cilat do të ndikojnë në sigurinë kombëtare dhe menaxhimin e një infrastrukture strategjike.
“Ore është e turpshme që të vijë drejtori i portit një njeri që nuk di not. Ai nuk di not jo më të bëhet drejtori i portit. Një kosovar, të vijë këtu të bëhet drejtori i portit. Pika strategjike e Shqipërisë. Është siguria kombëtare. Ai nuk di asgjë, nuk e njeh fare. Ai qoftë i shkëlqyeshëm në shkollë, sido që të jetë, ai nuk njeh terrenin”, tha Merkoçi, duke shtuar më tej se emërimi i tij do të “degradojë” Portin dhe se të “gjitha marrëzitë do t’i paguajnë shqiptarët”.
Zv/kryeministrja Belinda Balluku prezantoi Liburn Aliun si drejtor i përgjithshëm i Autoritetit Portual Durrës.
