Një aksident i rëndë ka ndodhur mesditën e sotme në Tiranë, ku ka mbetur i plagosur rëndë Luan Pirdeni, babai i Ministres së Shtetit për Administratën Publike dhe Antikorrupsionin, Adea Pirdeni.
Ngjarja është regjistruar rreth orës 12:00 në rrugën “Bardhyl”, një zonë me qarkullim të lartë në kryeqytet, ku 87-vjeçari po lëvizte me biçikletë në momentin kur është përplasur nga një motomjet.
Menjëherë pas goditjes, i moshuari është transportuar me urgjencë drejt Spitalit të Traumës për të marrë ndihmën e parë mjekësore.
Burimet paraprake nga spitali bënë me dije se gjendja e tij shëndetësore paraqitej kritike dhe se ai ndodhej nën kujdesin intensiv të mjekëve për shkak të dëmtimeve të marra nga përplasja e fortë. Por sipas një njoftimi të fundit të policisë, mësohet se babai i ministres ka ndërruar jetë në spital.
“Tiranë-Specialistët e qarkullimit rrugor arrestuan shtetasin S. M., 31 vjeç, pasi në kryqëzimin e rrugës “Bardhyl” me rrugën “Kongresi i Manastirit”, duke drejtuar motomjetin, është përplasur me biçikletën me të cilën lëvizte shtetasi L. P., 87 vjeç. Si pasojë e aksidentit, 87-vjeçari ka humbur jetën në spital. Grupi hetimor vijon punën për sqarimin e plotë të rrethanave të aksidentit“, jofton policia./ JOQ
