Edi Rama prej disa ditësh ndodhet në një vizitë zyrtare në Japoni, ku përveç politikanëve ai ka takuar dhe shqiptarë të cilët jetojnë dhe punojnë aty. Rama ka postuar takimin e veçantë që ka zhvilluar në Hiroshima me një shqiptar nga Tepelena.
“Në Hiroshima, por nuk është vetëm flamuri por është edhe Flamurtari”, dëgjohet të thotë Rama ne fillim te videos.
Flamuri i cili është nga fshati Nivicë i Tepelenës ka rrëfyer se prej 17 vitesh ai jeton në Japoni por shumë shpejt do të kthehet në Shqipëri për të zhvilluar biznesin e tij, pasi ashtu si dhe kryeministri i tha “guri i rëndë në vend të vet”.
“Mirë se na erdhe kryeministër. Është kënaqësi që na erdhe dhe është kënaqësi që kudo që shkon shqiptarët i takon. Unë jam nga Nivica,Tepelenës, jam martuar me japoneze. Kam 17 vite këtu, më mungon Shqipëria. Ju bëj thirrje shqiptarëve që të mos largohen nga Shqipëria. Shqipëria është vendi me i mrekullueshëm, këtu punoj 18 orë në ditë edhe Japonia është vend i zhvilluar dhe shumë i vështirë. Punoj 18 orë në ditë, dhe jam shumë i vetmuar, me mungon Shqipëria vendi im dhe do kthehem. Do kthehem sepse fshati ka marrë një zhvillim që mendoj se është shumë herë më mirë se këtu ku ndodhem, sinqerisht”, tha ai në krah të Ramës.
