Kryeministri Edi Rama është ndalur te protestat e zhvilluara në Tiranë, duke i cilësuar ato si pjesë normale të jetës demokratike në një vend të lirë dhe duke theksuar se nuk duhen parë si “matje force”.
Rama u shpreh se, pavarësisht numrave të pjesëmarrjes në protesta, ato duhen vlerësuar sipas kauzës dhe kërkesave që mbartin, duke shtuar se shumica e marrë në zgjedhje nuk e përjashton të drejtën e qytetarëve për të shprehur mendimin e tyre.
A e ke menduar dorëheqjen?
“Mbase e nxjerrë nga konteksti kjo gjë, duket sikur unë kam pasur një dilemë. Nuk ishte dilemë, por mundësi në kushtet kur gjërat që jam këtu bëhen të pamundura. Në rast se e flasim konkretisht, unë kam një kontratë me shqiptarët dhe do e respektoj deri në fund. Nuk diskutohet. Çfarë problemi ka që ndodhin protestat në lidhje me atë që thashë? Protestat janë pjesë e jetës demokratike në një vend të lirë. Protestat nuk janë matje force dhe as nuk maten me numra në kuptimin që pavarësisht se numrat mund të jenë të vegjël ose të mëdhenj, por maten me qëllime, kauzën dhe kërkesat. Fakti që unë dhe PS jemi votuar me një shumicë, e cila është shumë domethënëse, nuk e përjashton faktin që një pjesë e njerëzve jetojnë në këtë vend, kanë një opinion tjetër dhe duan ta shprehin. Këto janë dy gjëra që nuk e përjashtojnë njëra tjetrën”, u shpreh Rama.
Ai theksoi gjithashtu se ekzistenca e protestave nuk bie ndesh me legjitimitetin e qeverisjes, duke nënvizuar se në një shoqëri demokratike bashkëjetojnë opinione të ndryshme dhe e drejta për t’u shprehur lirshëm.
