Trajneri i Portugalisë, Fernando Santos, ka folur për situatën e krijuar në skuadër me Cristiano Ronaldon.
Që pas humbjes 1-2 përballë Koresë së Jugut në takimin e fundit në grup, mes Ronaldos dhe trajnerit Santos ka pasur fërkime, teksa situata ka mbërritur deri në kërcënimet e 37-vjeçarit me largim nga grumbullimi i kombëtares portugeze në Katar. Ka qenë vetë trajneri i luzitanëve, Fernando Santos, i cili ka vendosur t’u vërë kapakun diskutimeve në lidhje me situatën e Ronaldos.
“Ai nuk më ka kërkuar kurrë, nuk ka kërcënuar kurrë me largim nga grumbullimi i kombëtares portugeze. Mua nuk më ka thënë asgjë nga këto. Besoj se duhet ta shihni dhe mënyrën e sjelljes së tij. Festoi golat e shokëve të ekipit ndaj Zvicrës, i përgëzoi ata, por në një moment u largua i vetëm. Kjo nuk do të thotë asgjë”, ka deklaruar Fernando Santos.